Jeshi la polisi mkoani Arusha limetoa maelezo ya awali ya chanzo cha ajali mbaya iliyotokea eneo la mti mmoja wilayani Monduli na kusababisha vifo vya watu sita wakiwemo raia watatu wa kigeni na wengine watatu kujeruhiwa.
Akizungumza ajali hiyo kamanda wa polisi wa mkoa wa Arusha Ramadhani Nga’nzi pamoja na kutoa taarifa hiyo pia amesema taratibu za kuwatambua marehemu na nchi wanakotoka zinaendelea.
Majeruhi walionusurika kweye ajali hiyo ambao wamelazwa kwenye hospitali ya mkoa wa Arusha ya Mount Meru na wengine hospitali ya Lutheran ya Arusha ambao walikuwa kwenye lori wamesema gari lao lilipata hitilafu kwenye mfumo wa breki.
Kaimu mganga mkuu wa hospitali ya mkoa wa Arusha ya Mount Meru Dkt. Othumani Chande na Dkt. Peter Mabula wa hospitali ya Arusha Luthrani wamethibitisha kupokea miili mitano ya marehemu waliofariki katika eneo la ajali na kwamba mmoja alifariki wakati wanapatiwa matibabu.
Mkuu wa mkoa wa Arusha Bw. Mrisho Gambo wametembelea majeruhi na kwamba taratibu juu ya raia wa kigeni waliofariki zinaendelea .